Thursday, 03, December, 2020 info@saipalnews.com

पत्रकारको न्यूनतम पारिश्रमिक मासिक ४० हजार बनाउन माग

काठमाडौ । श्रमजीवी पत्रकारको पारिश्रमिक वृद्धिको सिफारिस कार्यान्वयन गर्न दबाब दिँदै नेपाल पत्रकार महासंघ अन्तर्गतको श्रमजीवी हीत प्रवर्द्धन समितिले आज न्यूनतम पारिश्रमिक निर्धारण समितिका अध्यक्ष गंगाधर पराजुलीको कार्यकक्ष घेराउ गरेको छ।

अपरान्ह महासंघका सचिव तथा समितिका संयोजक रामप्रसाद दाहालको नेतृत्वमा गएको समितिको टोलीले पूर्व घोषित कार्यक्रम अनुसार समितिको सञ्चारग्रामस्थित अध्यक्षको कार्यकक्षमा एक घण्टा धर्ना तथा घेराउ गरेको हो। संयोजक दाहालले असोज १ गतेदेखि नै लागू हुने गरी श्रमजीवी पत्रकारको न्यूनतम पारिश्रमिक मासिक ४० हजार रुपैयाँ हुनुपर्ने, तहगत वर्गीकरण समेत गरी सबै तहको न्यूनतम पारिश्रमिक निर्धारण गर्नु पर्ने, पाँच वर्ष भन्दा बढी स्ट्रिन्जरका रुपमा नियमित काम गरेको राष्ट्रिय सञ्चारमाध्यमका श्रमजीवीहरुलाई न्यूनतम पारिश्रमिकको मापदण्डमा ल्याउनु पर्ने र महिना समाप्त भएको पहिलो हप्ताभित्रै बैकिङ प्रणालीबाट तलब भत्ता भुक्तानीको व्यवस्था गर्नुपर्ने मागहरु पुनः स्मरण गराउनु भएको थियो ।

जवाफमा अध्यक्ष पराजुलीले पारिश्रमिक वृद्धिका लागि गठित कार्यदलले आजै समितिलाई प्रतिवेदन बुझाएकाले भोलि बस्ने समितिको पूर्ण बैठकले महासंघको माग सम्बोधन हुने गरी निर्णय लिने जानकारी दिनुभयो ।