Sunday, 20, September, 2020 info@saipalnews.com

नेपालमा कोरोनाको उच्च जोखिम

फागुन १७ काठमाडौँ । कोरोना भाइरस भनेर चिनिने कोभिड–१९ को संक्रमण विश्वका विभिन्न मुलुकमा फैलिने क्रम तीव्र भइरहेका बेला नेपालले संक्रमण फैलिएका देशबाट फर्किनेलाई बिनारोकतोक भित्र्याएको छ ।विश्व स्वास्थ्य संगठन ९डब्लुएचओ०ले बिहीबार मात्रै विभिन्न सात देशमा कोभिड–१९ को संक्रमण देखिएको भन्दै सबै सदस्य राष्ट्रलाई सतर्क रहन चेतावनी दिएको थियो ।डब्लुएचओले विश्वका ५० भन्दा धेरै देशमा यसको संक्रमण देखिएको बताइरहँदा ती देशबाट नेपाल भित्रिनेलाई रोक लगाउने वा विमानस्थलमा परीक्षणमा कडाइ गर्ने सम्बन्धमा नेपाल सरकारको कुनै तयारी भएको छैन ।

जेनेभामा बिहीबार आयोजित पत्रकार सम्मेलनमा डब्लुएचओका महानिर्देशक ट्रेडोसमा एडानोम गेहब्रेयससले कुनै पनि मुलुकमा कोभिड–१९ भित्रिन्न भनेर बस्नु नहुने बताए । बिबिसिका अनुसार बिहीबारसम्म दक्षिण कोरियमा दुई हजारभन्दा धेरै र जापानमा सात सयभन्दा धेरैमा यो भाइरसको संक्रमण देखिएको छ । त्यस्तै, इटालीमा ६५० जनामा भाइरसको संक्रमण पुष्टि भएको छ।

बेलायतलगायत युरोपका जर्मनी, फ्रान्स, इटाली र स्पेनमा यसको संक्रमण देखिएको छ । अन्तर्राष्ट्रिय मिडियाहरुका अनुसार चीनका अलावा दक्षिण कोरिया, इटाली, इरान र जापानमा संक्रमित धेरै छन्। यी पाँचै देशबाट नेपालमा निर्वाध पर्यटक भित्रिरहेका छन् । यो समाचार आजको कान्तिपुर दैनिकमा छ ।