Wednesday, 22, September, 2021 info@saipalnews.com

शीर्ष नेताहरुले प्रचण्डलाई भने, ‘गो अहेड’

काठमाडौं १२ साउन। नेपाल कम्युनिस्ट पार्टी नेकपामा देखिएको आन्तरिक विवाद झन पेचिलो बन्दै गइरहेको छ । स्थायी कमिटीको बैठक मंगलबार भोलिका लागि तय भएको छ । उक्त बैठकबारे अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच छलफल भएको छैन । दुई अध्यक्षबीच छलफल भएपछि मात्र स्थायी कमिटीको बैठक बस्ने सहमति भएको छ । तर अहिलेसम्म अध्यक्षद्वयबीच संवाद हुन सकेको छैन ।

यसअघिका बैठकहरु अध्यक्षद्वय बीचको छलफलमा सहमति जुट्न नसकेपछि स्थगित हुँदै आएको थियो । तर भोलिको बैठक स्थगित नहुने निष्कर्षमा प्रचण्ड–नेपाल समूह पुगेको छ । सोबारेमा प्रचण्ड निवास खुमलटारमा भएको छलफलमा भोलिको बैठक स्थगित नगर्ने निष्कर्ष निस्किएको छ ।

प्रधानमन्त्रीसमेत रहेका अध्यक्ष ओलीले स्थायी कमिटीको बैठक बसाउन इच्छा देखाएका छैनन् । अध्यक्ष प्रचण्डले शीर्ष नेताहरुलाई आफ्नो निवासमा भने, मैले प्रधानमन्त्री ज्युसँग पटक पटक छलफल गरेको छु । तर उहाँ स्थायी कमिटीको बैठकप्रति कुनै चासो देखाउनु भएको छैन ।

यो तरिकाले पार्टी कसरी अगाडी बढ्छ रु पार्टीलाई अनिर्णयको बन्दी कहिलेसम्म बनाई राख्ने ?त्यसपछि शीर्ष नेताहरुले अन्तिमपटक प्रधानमन्त्री ओलीसँग कुरा गर्ने र बैठक सञ्चालनका लागि नमाने अगाडि बढ्ने सुझाव दिएको खुमलटार स्रोतले जनाएको छ । अध्यक्ष प्रचण्डले यो विवादमा तटस्थ देखिएका स्थायी कमिटी सदस्य रामबहादुर थापालाई बोलाएर पनि विहान छलफल गरेका हुन् ।

प्रधानमन्त्री ओलीले राजीनामा दिनुपर्ने पक्षमा थापा देखिएको छैन । अध्यक्ष प्रचण्डले उनलाई बोलाएर त्यस विषयमा छलफल गरेको बुझिएको छ । अध्यक्ष प्रचण्डले प्रधानमन्त्री ओलीले पार्टीमा गर्दै आएको बदमासीमा बारेमा जानकारी गराएका थिए ।ओलीकै कारण पार्टी कसरी समस्यामा परेको छ भनि कुरा बादललाई सुनाएको स्रोतले जनाएका छन् । त्यसपछि बादलले प्रचण्डलाई अगाडि बढ्न संकेत गरेको बताइन्छ ।

विहान बादलसँग छलफल गरिसकेपछि अध्यक्ष प्रचण्डले झालनाथ खनाल र माधवकुमार नेपालसँग पनि छलफल गरेका थिए । भोलि बस्ने स्थायी कमिटीको बैठक सञ्चलनका विषयमा उनीहरुबीच छलफल भएको थियो । उनीहरुले पनि अब पनि प्रधानमन्त्री ओलीको प्रतिक्षा गरेर नहुने भन्दै पार्टीमा कदम चाल्ने अवस्था आइसकेको निष्कर्ष निकालेका थिए ।

प्रधानमन्त्री ओलीले माने पनि नमाने पनि स्थायी कमिटीको बैठक बस्ने र सोही बैठकमा पार्टीमा देखिएका सम्पूर्ण विवादको समाधान गर्ने सोचमा उनीहरु पुगेको स्रोतको भनाइ छ । पटक पटक बैठक स्थगित हुँदा राम्रो सन्देश नगएको भन्दै तोकिएको समयमा बैठक बस्ने र बहुमतले निर्णय गर्दै अगाडि बढ्ने निष्कर्षमा पुगेको खुमलटार बैठकमा सहभागी एक नेताले बताए ।

यस्तै माधव र झलनाथ खनालसँग छलफल चलिरहेकै बेला स्थायी कमिटीका सदस्य एवं परराष्ट्र मन्त्री प्रदीप ज्ञवाली र अर्का स्थायी कमिटी सदस्य तथा उर्जामन्त्री वर्षमान पुन पनि खुमलटार छिरेका थिए । मन्त्री ज्ञवालीलाई पनि प्रधानमन्त्री ओलीसँग सहमति नभए कति दिनसम्म पार्टीलाई अनिर्णयको बन्दी बनाई राख्ने भन्दै बहुमतका आधारमा निर्णय गर्दै अगाडि बढ्नेको विकल्प नरहेको कुरा राखेका थिए ।

स्रोतका अनुसार त्यसको जवाफमा मन्त्री ज्ञवालीले सर्वसम्मति नभए बहुमतको आधारमा अगाडि बढ्नुभन्दा अध्यक्षद्धयबीच एउटा समझदारी बनेपछि मात्र अगाडि बढ्दा उचित हुने धारणा राखेका थिए । अध्यक्षद्वयको पहल र सहमतिमा पार्टी एकीकरण भएको र अब यसलाई कसरी जोगाउने त्यसमा गम्भीर हुन उनले आग्रह गरेको थिए । दुईजना अध्यक्षको बीचमा संवाद हुन जरुरी रहेको भन्दै उनले प्रचण्डलाई सुनाएका थिए ।

त्यसपछि अध्यक्ष प्रचण्डले नेकपाका उपाध्यक्ष वामदेव गौतमसँग छलफल गर्नका लागि उनको निवास पुगेका थिए । उपाध्यक्ष गौतमसँग पनि भोलि बस्ने स्थायी कमिटीको बैठकबारे छलफल गरेका थिए । गौतमले पनि अब पार्टीलाई धेरै दिनसम्म अनिर्णयको बन्दी बनाउन नहुने भन्दै अगाडि बढ्न सुझाव दिएको प्रचण्ड निकट एक नेताले बताए ।त्यसअघि प्रचण्डले आफ्ना पक्षका स्थायी कमिटीका केही सदस्यहरुसँग पनि आफ्नो निवासमा छलफल गरेका थिए । शीर्ष नेताहरुले प्रचण्डलाई‘ गो अहेड’को नीति लिन सुझाएका थिए । साभार रातोपाटी